Мул уңыш алынсын

Җир җиләкләре өчен 2021 елның ай календаре буенча үсентеләргә орлык чәчә торган уңайлы көннәр бар. Аны чәчү һәм утырту өчен көн яктысы үсеше фазасында шөгыльләнәләр. Февраль аенда бу - 12-26сы.

Җиләк үсентеләрен орлыклардан үстерү процессы бик четерекле. Бу ысулны берничә сәбәп буенча сайлыйлар - утырту материалы җитмәсә, җиләкләрнең яңа төрләрен һәм сортларын алу өчен, үсентеләрне сату өчен.

Үсентеләрне үстерү өчен югары булмаган (5-6 см), әмма киң савытлар кулланыла. Бу җәһәттән капкачлы әзер пластмасса контейнер ярый. Артык су һәм һава йөрсен өчен төбендә берничә тишек ясарга кирәк. Туфракны савытка салганчы, аны иләргә киңәш ителә.

Җир җиләге артык туклыклы матдәләрсез, йомшак нейтраль туфракны өстен күрә. Контейнерлар иң якты урынга яки лампа астына куела. Үсентеләрен карга чәчү техникасын кулланып утырту мөмкин. Моның өчен әзер туфраклы контейнерга кар катламы сибелә. Ул 1 сантиметрга кадәр тыгызлана һәм өстән орлык салына. Контейнер капкач яки полиэтилен белән ябыла һәм суыткычның түбән киштәсенә куела, анда 3 көн тотыла. Бу ысулның өстенлеге - кар эрегән саен, орлыклар өслек буенча тигез бүленә һәм су белән туфракка тартыла.

Шытымнар 2-3 атнадан соң күренергә тиеш. Аларны 25 градуска кадәр җылылыкта тотарга кирәк. Ә беренче яшел яфраклар чыгу белән савытларны якты урынга күчерәләр, температураны 18-20 градуска кадәр киметәләр. Чәчүлекләрнең өстен ачмаска, әмма көн саен җилләтеп һәм, кирәк булганда, капкачтан конденсатны сөртеп алырга кирәк.

Үсентеләрнең беренче чын яфраклары үсеп чыгуга, аларны җилләтүне көн саен арттыру мөһим. Яраклашу процессын тизләтү өчен капкачта берничә тишек ясарга кирәк. Әгәр дә контейнерда шытымнар артык куе булып чыккан икән, аларны сирәкләү мөһим. Үсемлекләрне беренче көннән үк бик сак тәрбияләгез.

Пикировканы үсентеләрдә 2-3 чын яфрак чыккач кына эшлиләр. Аларны аерым контейнерларга (50-100әр миллилитрлы) күчереп утырталар. Май башында, урталарында суыклар була. Шуңа күрә туфракка утырткач, аларны каплау кирәк. Күчереп утыртканда, тамырлары тирәсендәге җирне саклап калырга тырышыгыз. Тирән утыртмагыз. Иң оптималь вариант - туфрак өслеге белән тигез урнаштыру.