Уртак бердәмлек кенә җиңүгә илтә ала

Светлана Хәлимова, муниципаль район хакимиятенең яшьләр сәясәте, физик культура һәм спорт комитеты рәисе вазифасын башкаручы:

Республика Башлыгы еллык Юлламасында республикабыз үсешенең төп юнәлешләрен билгеләде һәм 2026 елга кадәрге эшчәнлекнең өстенлекләрен ачыклады. Юлламаның асылы бер уртак максатка - «Барысы да җиңү өчен!» - юнәлтелгән. Махсус хәрби операция темасы Юлламаның башыннан ахырына кадәр кызыл җеп булып үтә: бары тик уртак бердәмлек кенә җиңүгә илтә ала.

Иң мөһим бурычларның берсе - сугышчыларга һәм һәлак булганнарның гаиләләренә ярдәм күрсәтү, шулай ук демобилизацияләнгән хәрбиләр белән системалы эш алып бару. Районыбызда әлеге юнәлешләрдә башкарылган эшләр куандыра: битараф булмаган райондашларыбыз маскировка челтәрләре үрүдә, токмач кисүдә, консервалар һәм окоп шәмнәре әзерләүдә актив катнаша.

Райондашлар белән беррәттән, спорт өлкәсе хезмәткәрләре һәм көмеш волонтерлар да беренче көннәрдән үк фронтка ярдәм күрсәтеп, уртак җиңүгә үз өлешләрен кертә. Алар Республика Башлыгы Радий Фәрит улы Хәбиров Юлламасының девизын эшләре белән хуплый. Шушы көннәрдә волонтерлар тарафыннан җыелган зур күләмле гуманитар ярдәм партиясе җибәрелде.
Әлеге ярдәм якташыбыз - «Әхмәт» кушаматлы сугышчыга тапшырылды. Ул кыска вакытлы ялдан соң янә махсус хәрби операция зонасына, үзенең сугышчан иптәшләре янына юл тотты. Үзе белән ул матди йөк кенә түгел, ә райондашларыбызның ярдәме, җылылыгы һәм тылның ышанычлы терәге булуын тою хисен дә алып китә.

Республика Башлыгының Юлламасы безгә уртак тырышлык белән теләсә нинди кыенлыкларны җиңеп чыга алачагыбызга ышаныч бирә. Сынаулар чорында халыкның чын асылы - берләшү һәм җиңү сәләте - аеруча ачык чагыла. Республика Башлыгы билгеләгән курс һәм заман таләпләре нигезендә без алга таба да барлык кирәкле ярдәмне күрсәтүне дәвам итәчәкбез.

Лилия ЙОСЫПОВА.