Медиамәдәниятне арттыру максатында

Бу мәктәп укучыларын иҗат итү, сәләтләрен, шулай ук вакыйгаларга үз карашларын күрсәтү һәм башкалар белән үз фикерләрен уртаклашуны берләштерә торган киңлек.

Күптән түгел Борай, Бөре, Чакмагыш, Кушнаренко, Илеш һәм Дүртөйле районнарыннан 100 дән артык катнашучы Дүртөйле шәһәрендәге Н.Нәҗми ис. башкорт гимназиясенә җыелдык. Алар үз мәктәпләрендә социаль челтәрләрдә контент булдыралар, роликлар һәм сюжетлар төшерәләр, фото һәм видео монтажлау белән шөгыльләнәләр. Районыбызны зона форумында авыл мәктәпләренең иң актив укучылары тәкъдим итте. Әйтергә кирәк, Росмолодежь гранты ярдәмендә республикада укучыларның медиамәдәниятен арттыру һәм мәгариф оешмаларында медиаүзәкләрне үстерү максатыннан «Медиазавод» проекты кертелә. Балалар бу көнне башка медиаүзәкләр вәкилләре белән танышты. Балалар «Мәктәп медиасы: укучыларның карашы» модерация сессиясендә, «Фотография нигезләре», «Копирайтинг», «Мәктәп телетапшырулары анонсы» , «Кадрда һәм кадр артында» мастер-классларында катнашты. «Медиа завод» проекты форумы Башкортстанның авыл балаларын мәгълүмат белән эшләргә өйрәтте. „Медиазавод“ укыту кластерының үзенчәлеге шунда ки, башта балалар модерация сессиясен үтәләр, анда үз фикерләрен баш мие штурмы форматында язалар. Шулай итеп алар чишелешләрне үзләре эзләргә һәм иҗади уйларга өйрәнәләр.

Мәктәп медиаүзәге балаларны заманча мәгълүмат шартларында тормышка әзерләргә ярдәм итә, мәгълүматның психикага тәэсире нәтиҗәләрен аңларга өйрәтә. Укучылар пропаганда, ялган мәгълүмат, реклама материаллары арасындагы аерманы аңлый, текст язу кагыйдәләрен, яңалыкларны сайлап алу ысулларын белә. Шулай ук грамоталы язу, сөйләм күнекмәләре дә үсеш ала. Журналист уены аша балалар грамоталы сөйләмгә өйрәнә. Яңалыкларга кереш сүзләр һәм кадр артындагы текстлар язганда, сөйләм күнекмәләрен өйрәнгәндә, укыганд а дикторлык осталыгына төшенә.

Шулай итеп, мәктәп медиаүзәге эше балаларны буш вакытларында мәшгуль итәргә мөмкинлек бирә, аларның үсешенә ярдәм итә. Мәктәп медиаүзәге укучылары конкурсларда актив катнаша. Иң яхшы эшләр белем учагының сайты һәм социаль медиа өчен кулланыла, бу мәктәп имиджын күтәрә һәм фәннәргә кызыксыну уята.

Лира ГАЛИЕВА, Кадер урта мәктәбенең тәрбия эшләре буенча директор киңәшчесе.