Мәктәп кыңгыравының чыңы

Чыгарылыш сыйныф укучылары өчен бүген иң истәлекле көн. Шушы уңайдан барысын да котларга Югары Яркәйдәге Т.Рахманов ис. урта мәктәпкә муниципаль район хакимияте башлыгы Илдар Мостафин, мәгариф ветераннары, укытучылар, ата-аналар килгән иде.

Тантананы мәктәп директоры Гөлнара Шафыйкова ачып, котлау сүзләрен изге теләкләрен җиткерде.

-Бүген иң якты, яшь күңелдә мәңгегә сакланучы бәйрәм. Әмма ул тормышта үз урыныгызны табу, киләчәк язмышыгызны билгеләүче уйланылган адым ясау чоры. Әти-әниләрегезгә лаеклы алмаш булыгыз, мәктәп данын югары тотыгыз, - дигән фатыйхасын бирде Илдар Иршат улы.

Укучыларның чыгышлары тәбрикләү сүзләре, изге теләкләр, фәһемле киңәшләр белән үрелеп барды. Агымдагы елда урта мәктәпнең 11 сыйныфын – 23, 9 сыйныфын 48 укучы тәмамлый.

Лира ГӘРӘЕВА.