Бай биографияле, үрнәкле тормыш юлы

Ул Рәисә һәм Васил Закировларның тату гаиләсендә туа. Бөек Ватан сугышында катнашкан, легендар, таләпчән, пунктуаль, алга карап эшли белгән җитәкче Васил Закирович улын кечкенәдән хезмәтнең, тир түгеп үстерелгән икмәкнеңкадерен белергә өйрәтә. Шуңа күрә урта мәктәпне тәмамлагач, Шамил Башкортстан авыл хуҗалыгы институтының агрономия факультетына укырга керә, аны 1977 елда тәмамлый.

Шамил Васил улы үзенең хезмәт эшчәнлеген «Искра» колхозында агроном булып башлый, аның рәисе Социалистик Хезмәт герое Т.С. Нәҗмиев була. Өч ел дәвамында ул хуҗалыкның легендар, энергияле һәм авыл хуҗалыгы продукциясе җитештерүенең барлык нечкәлекләрен белүче җитәкчесенең тормыш һәм хезмәт мәктәбен үтә. Аннары яшь белгечне «Биш партизан»колхозына хуҗалык рәисе урынбасары итеп җибәрәләр.

Үзен яхшы оештыручы итеп күрсәткән, кешеләрне үз артыннан ияртә белгән егетне 1980 елда Илеш районы Советы башкарма комитеты рәисе урынбасары итеп билгелиләр. Биредә ул үзен район масштабындагы җитәкче итеп, район халкының мөһим мәсьәләләрен хәл итүдә инициатива күрсәтә.

Район җитәкчелеге аңа җаваплы йөкләмәләрне ыша нып булачагын аңлый һәм 1981 елда ул КПССның Башкорт өлкә комитетына инструктор итеп чакырыла. Югары партия вазыйфасында эшләгәндә ул җаваплылык, максатчанлык, ярдәмчеллек, үз гамәлләрен җентекләп уйлый белү кебек югары сыйфатларын күрсәтә.

Партия һәм хуҗалык эшендә чыныгып, шактый тәҗрибә туплаган Шамил Васил улы 1985 елда Нуриман район партия комитетының беренче секретаре итеп
сайлана. Аның җитәкчелек иткән еллары район өчен интенсив үсеш чоры була.

1991 елда компартия эшчәнлеген туктату сәбәпле, ул хуҗалык эшенә күчә. 10 ел дәвамында Нуриман урман хуҗалыгын җитәкли, аны республика дәрәҗәсендә алдынгы урыннарга чыгара.

Нуриманлылар аны әле дә хәтерлиләр һәм хөрмәт итәләр. Алар белән Шамил Васиков хәзер дә аралаша, еш кына дусларында һәм иптәшләрендә кунакта була, алар үзләре дә килә. Тормыш шундый, еллар узу белән ул туган якларына тартыла һәм 2001 елда районга кайта һәм Илеш урман пункты директоры булып эш башлый. Аннары аны район авыл хуҗалыгы идарәсе начальнигы урынбасары итеп билгелиләр.

Район җитәкчелеге, бай тормыш һәм хезмәт тәҗрибәсен, актив тормыш позициясен исәпкә алып, 2006 елда муниципаль район хакимияте башлыгының төзелеш һәм торак-коммуналь хуҗалык буенча урынбасары итеп тәгаенли. Бу вазыйфа бик җаваплы, тынгысыз һөнәр, чөнки бу кешеләрнең көндәлек тормышы һәм тормыш тәэмин итү объектларының уңышлы эшләве белән бәйле. Төрле өлкәләрдә белемле, аралашучан булу, кешеләр белән уртак тел табу таләп ителә.

«Югарыда» элемтәләре булганга, ул һәрвакыт «югары кабинетларга» кереп йөрде, районның халык һәм предприятиеләре тормышын тәэмин итү буенча бик
күп мөһим мәсьәләләрне хәл итүгә иреште. Үзен төзелеш тармагында белемле белгеч итеп күрсәтте, объектларны вакытында проектлау, аларны планга кертү, югарырак органнарда төзелешкә лимитлар һәм акчалар алу өчен барлык сәләтләрен дә кулланды.

Мәсәлән, Түбән Яркәйдәге Заводской микрорайонын «Авыл территорияләрен үстерү» Русия программасынакертү өчен, хакимият башлыгы И.И Мостафин белән бергә аңа Мәскәүдә алты тапкыр булырга туры килә. Нәтиҗәдә, кыска вакыт эчендә газ казанлы заманча мәктәп, балалар бакчасы төзелде, комплекслы рәвештә су, электр, газүткәргеч үткәрелде. Шулай ук аның турыдан-туры кураторлыгы вакытында физкультура сәламәтләндерү комплексын сафка керттеләр, янәшәдә – балалар бакчасы. Югары Яркәй авылында яшәүчеләрне эчәр су белән тәэмин итү өчен Иске Күктауда суүткәргеч булдырылды. Ул вакытта проект эшләре планына Түбән Череккүл авылындагы социаль комплекс һәм балалар бакчасы, район үзәгендәге чистарту корылмалары, үзәк котельня реконструкцияләнде һәм проектлаштырылды. Шулай ук аның тырышлыгы белән юллар төзү, авыл җирлекләрендә һәм районда янгын сүндерү хезмәтләрен
ныгыту, социаль объектларны, коммуникацияләрне, электр һәм газ челтәрләрен капиталь ремонтлау, торак пунктларны төзекләндерү буенча күп эшләр башкарылды.

Хезмәт баскычыннан тиз күтәрелүгә карамастан, ул һәрвакыт гади, тыйнак, аралашучан, ярдәмчел кеше булып калды. Шуңа күрә ул районда гына түгел,
республикада да кешеләрнең ихтирамын яулады.

Ш.Васиков Башкортстан Республикасының халык депутаты булды, күп тапкырлар район һәм авыл Советы
депутаты итеп сайланды, РФ хезмәт ветераны исемен зур горурлык белән йөртә.

Нинди генә җаваплы эш ышанып тапшырылмасын, Шамил Васил улы максатчанлыгы, нәтиҗәгә омтылучан булуы белән аерылып торды һәм аны лаеклы үтәп
чыкты. Аның тырыш хезмәте лаеклы бәһаланды - ул Башкортстан Республикасының Мактау грамотасы, Төзелеш һәм архив министрлыгының Мактау грамотасы
белән бүләкләнде.

Һәрвакыт җылылык һәм игътибар, хөрмәт һәм абруй белән әйләндереп алынган кеше генә үз язмышыннан канәгать. Шамил Васил улы үрнәкле хезмәт юлы үтеп, тормыш иптәше Фира Мөбарәк кызы белән бәхетле тормыш алып бара. Алар уллары Уралны тәрбияләп, олы тормыш юлына чыгардылар, онык сөю бәхетенә ирештеләр. Әйтергә кирәк, Фира Мөбәрак кызы бар гомерен балаларга белем бирүгә багышлады. Васиковлар сәяхәт итәргә яраталар, республика буйлап күп йөриләр, табигатькә еш чыгалар, дару үләннәре, җиләкләр, гөмбәләр һ.б. әйбер җыялар. Хәтта Әстерханга балык тотарга да баралар. Ихата тутырып кош-корт асрыйлар. Бакчаларында төрле җимеш агачлары, куаклары, теплицада яшелчәләр урын алган. Алар ел саен мул уңыш белән сөендерә. Күз явын алырдай аллы гөлле чәчкәләр бакчага, тирә-якка тагы да ямь бирә. Гомумән, ишегалдындагы, бакчадагы тәртип Васиковлар гаиләсенең хезмәт сөючәнлеген тагын бер кат раслый һәм алар күбебезгә үрнәк булып тора.

Бу истәлекле көндә – 70 яшьлек юбилеенда хөрмәтле Шамил Васил улына ныклы сәламәтлек, гаилә бәхете, җан тынычлыгы, бетмәс-төкәнмәс энергия һәм иминлек телим.

Автор: Фәһим Әюпов, хезмәт ветераны. Югары Яркәй авылы.