Ана булу зур бүләк

Ул һәр вакытта да ягымлы күз карашлары белән иркәли, кирәк чакта төпле киңәшләрен бирә. Илеш авылында гомер кичерүче Айсылу Ситдыйковага бу сыйфатларның барысы да хас.

Иске Нәдер авылында туып-үсеп, буй җиткергән матур кыз Илеш егете Рәүдәт Раил улына кияүгә чыга. Яшьләр тырышып дөнья көтә башлыйлар, берсеннән-берсе матур дүрт улга һәм бер кызга тормыш бүләк итәләр. Иң өлкән уллары Раушан “Илеш” кооперативында уңышлы эшләп йөри. Раушат, Айназ, Айзат, Арина - мәктәп укучылары. Ситдыйковларның тату гаиләсендә тәрбия алган балалар акыллы, эшчән һәм изгелекле булып үскәннәр. Йорт-кура эшләренең барысын да белеп, барсын да җиренә җиткереп башкарырга өйрәнгәннәр, мал-туар асрауда, кош-корт, бакча үстерүдә бар көчләрен салып ярдәм итә алар.

Ситдыйковлар гаиләләре белән районда, республикада уздырылган конкурсларда актив катнаша, призлы урыннар яулыйлар. Өстәвенә, җыр-биюгә дә маһирлар.

Агымдагы елда Айсылу Алексеевна “Ана даны” медале белән бүләкләнде.