Мәктәпнең уңышы җитәкче кулында

Ул күпләр өчен интеллигентлык һәм барлык кешеләргә карата ихтирамлы мөнәсәбәт, зирәклек, профессиональлек, үз эшенә тугрылык үрнәгенә әверелде. Фәридә Әмирҗан кызы талантлы педагог, акыллылык, сизгерлек, сабырлык, ихласлык кебек сыйфатларга ия. Болар аңа балачактан ук салынган.

Һәр кешенең бәхете - аның гаиләсендә. Ә гаилә тарихы ерак 1954 елда язмыш ике гүзәл кешене – Әмирҗан Зөбәеровны һәм Лилия Якупованы кавыштырудан башлана. Гаиләдә дүрт кыз туа: Фәйрүзә, Роза, Фәридә, Клара, алар әти-әниләренең горурлыгы була. Иске Кыргыз башлангыч мәктәбен тәмамлаганнан соң, Фәридә Әмирҗан кызы Андреевка урта мәктәбендә укуын дәвам итә. 1978-1983 елларда Бөре дәүләт педагогия институтында укый. 1983 елда көч һәм энергия белән тулы яшь педагог туган районына кайта, анда Йонны төп мәктәбендә рус теле һәм әдәбияты укытучысы һәм өлкән вожатый булып хезмәт юлын башлый. Бер елдан соң аны тәрбия эшләре буенча директор урынбасары итеп билгелиләр. 2000 елдан Йонны авылы төп гомум белем бирү мәктәбе коллективын җитәкли. Шул вакыттан алып мәктәп яхшы якка үзгәрде, матурланды һәм яхшырды.

Фәридә Әмирҗан кызы кырык елдан артык педагогик хезмәт стажына ия һәм шуның һәм егерме алты елы директор вазифасында. Бу күпме, азмы? Мөгаен, һәркемгә бу тормыштагы чор гына түгел, шатлыклар һәм кайгылар, җиңүләр һәм уңышсызлыклар белән тулы гаять зур юлдыр. Ләкин бу еллар мәктәп җитәкчесе өчен нәрсәне аңлата? Бу - балаларны тәрбияләү, үз-үзеңне камилләштерү һәм бердәм белем бирү киңлеген булдыру буенча даими һәм максатчан эш.

Фәридә Әмирҗан кызы өчен мәктәп – аның тормышы, өмете һәм шатлыгы дип әйтергә була. Җитәкчелек итә башлаганнан бирле ул үзенең осталыгын һәм администраторның иң яхшы сыйфатларын күрсәтте. Бу педагогик коллективка яшь буынны укыту һәм тәрбияләүнең төрле мәсьәләләрен хәл итә алырлык тату һәм бердәм командага әверелергә мөмкинлек бирде. Аның җитәкчелегендә эшләп, укытучылар үз эшләрендә профессионал дәрәҗәгә күтәрелде. 35 ел рәттән безнең мәктәп укытучылары «Ел укытучысы» муниципаль конкурсында катнашып, җиңүче һәм призер булды, укытучыларның 75 проц. югары квалификация категориясенә ия. Шулай ук укытучылар, укучылар муниципаль, республика һәм бөтенрусия ярышларында, конкурсларда һәм смотрларда катнашкан өчен күп тапкырлар Мактау грамоталары һәм Дипломнар белән бүләкләнде. Һәм монда, һичшиксез, мәктәп директорының өлеше зур.

Ул белем бирү процессын оста оештыра, җитәкчелекне зирәкле тормышка ашыра, хезмәткәрләрне һәм укучыларны мотивацияләүнең төрле методларын нәтиҗәле куллана. Күп еллар дәвамында мәктәпнең педагогик коллективы мәгариф учреждениеләрен яңа уку елына әзерләү буенча призлы урыннар яулады. Белемнәрне даими камилләштерү белән беррәттән, мәктәпнең матди - техник базасы да ныгытыла. Ә капиталь ремонттан соң тыштан да, эчтән дә мәктәп якты һәм заманча төс алды.

Мәктәптә башкарылган эшне санап бетерерлек түгел. Бина интернет челтәренә тоташтырылды, заманча техник укыту чаралары белән җиһазландырылды, «Үсеш ноктасы» үзәгенең ике кабинеты эшли.

“Яраткан хезмәт – илһам һәм канәгатьлек чыганагы», - ди Фәридә Әмирҗан кызы. Тырыш хезмәте, үз һәм башкаларның уңышларын күрү сәләте, җитәкченең таланты лаеклы бәя алды: үсеп килүче буынны укыту һәм тәрбияләү эшендә уңышлы һәм нәтиҗәле хезмәте һәм җәмәгать эшендә актив катнашканы өчен Башкортстан Республикасы Мәгариф Министрлыгының, районы мәгариф бүлегенең Мактау грамоталарына лаек булды. Русия Федерациясе «Халык мәгарифе отличнигы», «Башкортстан Республикасының атказанган укытучысы» билгеләре белән бүләкләнде. Йонны төп гомум белем бирү мәктәбендә директор вазифасында намуслы хезмәте өчен БР Хөкүмәтенең Рәхмәт хатын алды.

Фәридә Миңнеголова - мәктәпнең уңышлы директоры, үрнәкле педагог. Ул - яхшы психолог, югары әхлаклы, көчле һәм иҗади шәхес, даими үсүче, камилләшүче, үзенә катгый таләпләр куючы кеше. Бу сыйфатлар директорны уңышлы итә, димәк, аның уку йорты да уңышлы.

Районыбызның данлыклы мәктәпләренең берсе булган Йонны төп мәктәбе директоры Фәридә Әмирҗан кызын барлык хезмәткәрләр, укучылар, ата-аналар юбилее белән котлыйбыз. Сезнең мәгарифкә һәм безнең мәктәп үсешенә керткән өлешегезне бәяләп бетергесез. Ныклы сәламәтлек, бетмәс энергия һәм киләчәктә дә барлык башлангычларыгызда уңышлар телибез. Һәр башкарган эшегез канәгатьлек һәм шатлык китерсен, ә коллектив сезне һәрвакыт хупласын һәм рухландырсын.

Гөлнара РӘХМӘТУЛЛИНА. Йонны төп мәктәбе укытучысы.