Сайлау участогында бәйрәм атмосферасы

Халыкта, әгәр “Масленица” атнасын коймаклар пешереп, җырлар-биюләр, күңелле уеннар белән үткәрәсең икән, йортыңа һичшиксез бәхет керәчәк, дигән ышану бар.

“Масленица” – элек-электән сакланып килгән, көтеп алынган һәм иң чагу бәйрәмнәрнең берсе. Ул җиде көн дәвам итә. Бу көннәрдә кешеләр күңел ача, кунакка йөрешә һәм коймак пешерәләр. Коймак атнасы – язны каршылауга багышланган тантаналы вакыйга.

Чарада күңелле итеп кышны озату, табигатькә җанлану һәм кояш җылысы алып килүче язны каршылау – “Масленица” йоласы һәм карачкы яндыру йоласы үткәрелде. Авыл халкы бөтен тырышлыкларын, осталыкларын куеп күңел ачты. Бәйрәм дәвамында сайлау участогы алдындагы мәйданда җыр-биюләр башкарылды, күңел ачу уеннары үткәрелде. Бәйрәмгә килүчеләр кышны шаян җырлар, әйлән-бәйлән, төрле уеннарда катнашып, күңелле итеп озаттылар, әлеге бәйрәмнең атрибуты булган тәмле коймаклар белән сыйландылар.