Киләчәкне куанып каршылыйк

Кадерлеләрем, киләсе көннәребезне күңелле кичләр, кызыклы кичәләр, концертлар көтсен. Күрерсез, кул кушырмаганнарга күпләп капиталы килер. Китап киштәләрегездә күпләп китап күрәсе килгәннән, кечкенәләребезнең кәнфитләре, курчаклары кырында кызыклы китаплары куандырсын. Кешеләр кырында кечкенәләребез – киләчәгебез кимсенмәсен, кыенсынмасын, кәефләренең күтәренкелеге, күзләрендәге куаныч кимемәсен. Кардан Кар кызын, куянкайларны «коеп» куйганнарын күреп куандык.

Көмеш кыңгыраулар капка каккан көннәрдә килешле күлмәкләребезне киеп, кухняларыбызда кадерлеләребезгә катлам-катлам коймак, кыстыбыйларыбызны куйдык. Кыйблабызның Коръәни Кәримгә каравын күреп куанучы картларыбызга кадер күрсәтик, картайтмыйк, күркәм көнкүрешебезне күреп куансыннар. Кадерлеләрем, кода-кодагыйлар, кайнана-килен, кыз-кияү, килендәшләр, кайнеш-кодачалар, кардәшлек кануннарына каршы килмичә, күгәрченнәрдәй көн күрүчеләребезгә карап куаныйк. «Козгын», «карга», «кәккүк» кебек кешеләрдән, куштаннардан котылып, карлугачлардай кайгыртучанлык күрсәтеп, күреп, көн күрүчеләр күбәйсен.

Кавышучылар күбәеп, киленнәр китмәскә килсен. Канатларыбыз каерылмасын. Күгебезне караңгылык капламасын, канкоешлар күрмәсен киләчәк.

Картәниләребезне – күлмәк, картәтиләребезне – камзул, кәләпүш, кызларны косметика куандырыр. Кадерлеләрегезгә кыйммәтлерәген кызганмассыз кебек.

Күкрәкләребезгә кысып кочар кечкенәләребез, кай тып керергә квартираларыбыз, кәсепләребез, көч-куәтләребезгә канәгать калып, куанып кына көн күрик. Кешелек кыйммәтләрен каралтмыйк.

Котлаучыгыз кемме?

Киләчәкне куанып каршылаган кадерлеләрдән-кадерле картларымның кызлары, кан кардәшлеккә кер кундырмаучы, кадерлемнең кадерлесе, күз карамдай кызларымның кояшы, кияүләремнең киң күңелле кайнәләре, колынчакларымның кайгыртучан картәниләре, килешеп кенә көн күрүче кодагый, көләч «күршекәй», кайберәүләрнең күптәнге классташы, курсташы, коллегасы, картлык капиталы килгән көннән кунакчыл «кухня королевасы».., кыскасы, каләмле киңәшчегез.

Рима СӘЕТОВА. Этәй авылы.